شاطير اوغلان، گؤروم آللاه سنه وئرسين بركت
قوي اونون ياخشي النسين، خميرين اللنسين
چوخ پيشير، ياخشي پيشير، گؤيده فيريلدات كورهگي
منبر اوسته چؤرهگين قوي قالانيب تللنسين
طير اوغلان، گؤروم آللاه سنه وئرسين بركت
قوي اونون ياخشي النسين، خميرين اللنسين
چوخ پيشير، ياخشي پيشير، گؤيده فيريلدات كورهگي
منبر اوسته چؤرهگين قوي قالانيب تللنسين
تنديرون طور تكين، عرشدن آلسين ايشيقي
ارسينون بيرق احرار تكين ميللنسين
كاسيبين قيسمتي يوخ، ياغلي پيلو دوشلهماغا
بو ياوان سنگكي بير قوي ساحاليب سئللنسين
غئيرتين قورباني، سن موشتريني تئز يولا سال
ائل ايچينده ياراماز آرواد – اوشاق وئللنسين
قوي ايكيريالليغي ساتسين خوزهيين بير ماناتا
ديشي دوشموش قوجانين آغزي نهدير ديللنسين؟
او، منيم شعريمه چوخ ماييل اولان وردسته
دئينه: شاعير چؤرهگي قوي قوروسيون، گللنسين
من ليغيرسا يئيه بيلسمده، فلوس لازيم اولار
بو سوسوز باغچا نه لازيم بو قدر بئللنسين؟
ساري يازليقدان اولان گوللي، قيزارميش سنگك
گرك آغزوندا اريك تك ازيليب، هللنسين
تهرانين غئيرتي يوخ « شهرياري » ساخلاماغا
قاچميشام تبريزه، قوي ياخشي – يامان بللنسين
باخچاميز فاسيد اولوب، هر گولي اكرسن آچماز
يئري داشليقدي، گرك توپراغي غربيللنسين
مدعاسي چوخ اولان، طبل تهي پر بادوخ
نئيلهيك، ضيرناچينين بورني گرك يئللنسين
بو گيجللنمهدن، آي چرخ فلك، سن ده يورول!
بو حياسيز گونه گؤزلر نه قدر زيللنسين؟
« سعدي » نين باغ گلستاني گرك حشره قدهر
آلماسي سلله له نيب، خورماسي زنبيللنسين
لعنت او باد خزانه، كي « نيظامي » باغينين
بير ياوا گولبسرين قويمادي كاكللنسين
آرزو جولگه لرينده، بيز اكن مزرعهلر
دئيه سن ساقه لنيب، قوي هله سونبوللنسين
قيصصه چوخ، قافيه يوخ، آختاريرام تاپميورام
يئريدير « شهريار » ين طبعيده تنبللنسين
.لطفا نظر بدهید. ممنون.